Ish gjyqtari i gjykatës së Lartë Admir Thanza është shpallur fajtor për mos deklarimin në formularët e dekriminalizimit të një dënimi që ai ka kryer në vitin 1999 në Itali. Për këtë Gjykata e Shkallës së Parë Tiranë vendosi ta dënojë me 9 muaj burg, dënim që konvertohet me 18 muaj në shërbim prove. Seanca u zhvillua pa kamera dhe ndryshe nga herët e tjera i pranishëm ishte vetë Thanza i cili zgjodhi që ta bënte vetë mbrojtjen. Në materialin 29 faqesh, ish-gjyqtari i shkarkuar nga vetingu nuk e pranoi në asnjë moment se ka shkelur ligjin duke mos deklaruar dënimin, pasi ai asnjëherë nuk është dënuar. Përsa i përket rastit të vitit 1999, ai i qëndroi shpjegimit se kishte marrë përsipër fajin e nipit të tij të mitur për vjedhjen në një qendër tregtare në Pisa të Italisë, por me një marrëveshje me institucionet italiane të ligjit. Sipas Thanzës, vendimi me marrëveshje për dënimin 40 ditë burgim dhe 100 mijë lireta gjobë, nuk është dënim penal dhe se nuk e ka patur detyrim deklarimin në formularët e dekriminalizimit.
Thanza tha gjithashtu se prokuroria ka vënë në presion gjykatën kur citon në pretencën e kërkimit të dënimit thënie të komisioneve të vettingut.
“Prokuroria i thotë gykatës citimin e KPK-së se vepra penale e falsifikimit të formularit e kryer prej një gjyqtari të Gjykatës së Lartë ka cënuar thellësisht besimin e publikut në organet e drejtësisë, besim i cili kërkohet të kthehet me reformën aktuale në drejtësi.” Kjo më kujton vitet 1988 kur isha student dhe na mësonin parrullat e famshme të prokurorëve të asaj kohe kur thoshin “ I pandehuri ka cënuar linjën e partisë dhe për të ndalur përhapjen lufta e klasave duhet të vazhdojë”
Nga ana e prokurorisë u kërkua dënimi ish gjyqtarit të të Gjykatës së Lartë me 1.5 vite burgim dhe në përfundim gjykata vendosi shpalljen fajtor të ish-gjyqtarit. Ishte procesi i vettingut dhe operacioni ndërkombëtar i monitorimit që zbuloi se Admir Thanza prej 19 vitesh fshihte një dënim të dhënë nga drejtësia italiane. Për këtë Thanza u shkarkua nga të dyja shkallët e vettingut si i papërshtatshëm për vazhdimin e funksionit të tij.
31.05.2019
