“Viktimat e dekriminalizimit” në politikë janë të shumta në nivel qendror dhe lokal, megjithatë, të dhënat mbi deputetët e dorëhequr ose të arrestuar, atyre që iu është ndërprerë mandati ose atyre që janë nën hetim, si dhe e njëjta edhe për kryetarët e bashkive e ish ministrat, – tregon se asnjë prej personave të përfshirë nuk është grua në politikë dhe asnjë prej tyre nuk ka qenë produkt direkt i votës konkurruese statutore brenda partive politike. Për më tepër, asnjë prej tyre nuk është përjashtuar ende nga partia e vet politike, – vlerësim që vjen për të gjitha partitë parlamentare dhe ish parlamentare.
Partitë kanë deklaruar se do të aplikojnë standarde të larta etike dhe proces paraprak selektimi për kandidatët dhe zyrtarët e tyre të zgjedhur dhe të ofruar në zgjedhje, si dhe do të largojnë nga radhët e tyre individët me rekorde kriminale, por ende nuk ka një akt konkret për këtë. Konkretisht, asnjë prej deputetëve të penalizuar me heqje mandati apo detyrim për dorëheqje, për përfshirje në listën e zezë amerikane apo të dënuar nga sistemi gjyqësor shqiptar, nuk është penalizuar dhe as përjashtuar nga partitë e tyre politike.
Standardi i përjashtimit të individëve të tillë është standard i partive kryesore evropiane, PES dhe EPP ku aderojnë partitë tona kryesore politike, si dhe është standard që nënkuptohet nga vetë ligji i dekriminalizimit dhe merr vlerë politike edhe nga vetë dokumentacioni i brendshëm i partive politike. Përpjekja për të t’i larguar disa individë problematikë nga postet në parlament, qeveri, pushtetin vendor, administrata publike, etj, por duke u lënë atyre hapësirë veprimi e drejtimi në nivel partiak e lokal, në fakt është një zhvillim në thelb e pasojë kundër parimeve të dekriminalizimit dhe të Kushtetutës së Shqipërisë.
