Lajm i mirë për drejtësinë, por një leksion tjetër për politikën: Bllako bëhet deputeti i dytë që jep dorëheqje dhe që përballet me burgimin, për shkak të përfshirjes në një skandal të madh korrupsioni dhe abuzimi me pushtetin. Instituti I Studimeve Politike (ISP) ka monitoruar procesin zgjedhor paraprak në PS, PD, LSI, etj dhe gjithnjë ka kritikuar faktin se disa individë, pa CV politike por me pasuri të mëdha, promovohen direkt në listat e kandidatëve për deputetë duke injoruar sistemin e meritës, karrierës, transparencës dhe llogaridhënies. Të gjithë individët e larguar nga dekriminalizimi nuk janë produkte zgjedhore nga strukturat e brendshme partiake, por produkte të emërimit nga lart, të njohjeve të shkurtra personale dhe të rrugës së shkurtër drejt politikës, ashtu si të gjithë janë individë me pasuri të madhe financiare, të pamundur për ta justifikuar me CV e tyre profesionale. Lajm i mirë distancimi i PS nga deputeti nën akuzë, por vullneti politik kërkon akte më serioze dhe më konkrete. Rasti Koka e Bllako, apel për reformimin tërësor të legjislacionit të partive politike dhe sistemit të karrierës brenda tyre, rast për hetime për ndikime të financimeve informale në procesin e hartimit të listave të kandidatëve për deputetë, të financimit të partive politike dhe të fushatave elektorale.
Pas kerkeses se Prokurorise speciale per dhenien e lejes nga Kuvendi per arrestimin e tij, me 30 mars 2022 deputeti Alqi Bllako deklaroi doreheqjen nga mandati parlamentar. Ne dorehetje thuhej:
“Natyrisht jam i tronditur nga kërkesa e SPAK-ut për ndalimin tim. Kam bindjen e thellë që një proces i paparagjykuar dhe i drejtë do ta provonte lehtësisht pafajësinë time; me bindjen e palëkundur se as kam shkelur kurrë ligjet e vendit e madje as kam thyer kurrë etikën e detyrës që kam ushtruar! Sidoqoftë, nuk ka arsye të angazhohet Kuvendi i Republikës së Shqipërisë për këtë çështje dhe as nuk dua të përfitoj apo të më ofrohet një trajtim ndryshe nga çdo qytetar tjetër i vendit tonë. Unë nuk kam mburojë mandatin e deputetit, por të vërtetën për pafajësinë time. Këtë do ta provoj në gjykatë dhe përpara opinionit publik. Prandaj kam vendosur që ditën e nesërme t’i paraqes kryetares së Kuvendit dorëzimin e mandatit tim si deputet i Republikës së Shqipërisë, dhe të përballem me akuzën pa asnjë privilegj. Si një qytetar i zakonshëm, si prind dhe familjar i përgjegjshëm; dhe mbi të gjitha si një shërbëtor publik, që padyshim e kupton se çdo angazhim vjen edhe me çmimin e përbaltjes politike apo edhe me detyrimin e sqarimit të së vërtetës para drejtësisë! Ju jam thellësisht mirënjohës për mbështetjen! Mezi pres t’u provoj të vërtetën dhe të drejtën e pastër miqve, dhe padyshim armiqve!”.
