Në kuadër të një monitorimi të kryer me 2019-2020 nga ana e Institutit të Studimeve Politike Tiranë, lidhur me nivelin e integritetit të deputetëve të Kuvendit të Shqipërisë dhe shmangien nga gjendjet e ndryshme të konfliktit të interesit gjatë veprimtarisë që kryejnë, është konstatuar se ish deputeti i Partisë Socialiste në Kuvendin e Shqipërisë Z. Sadri Abazi, ka qenë në gjendje të konfliktit të interesit në kundërshtim me ligjin.
Sipas njoftimit te asaj periudhe, “nga të dhënat që kishte administruar dhe dispononte ISP nëpërmjet komunikimit me Ministrinë e Financave dhe Posta Shqiptare është evidentuar fakti se Shoqëria “Usluga” e regjistruar me Vendim Gjykatës Tiranë Nr. 5246/1 dt.19.02.1993 me administratore aktuale Znj. Aurora Abazi (vajza e deputetit Sadri Abazi) kishte lidhur kontratë qeraje Nr.722 dt.08.03.2019 me Posta Shqiptare sh.a për një objekt në rrugën “Reshat Petrela” Tiranë me numër pasurie 7/168, Zona Kadastrale Nr.8330 me afat 5 vjeçar. Nga të dhënat e ekstraktit të QKB rezultonte se bashkëpronarë të shoqërisë Usluga Sh.p.k dhe përfitues të kontratës së mësipërme, ishin me pjesë të barabarta bashkëshortja dhe fëmijët e deputetit Sadri Abazi.
Nisur nga të dhënat e mësipërme, ISP, duke konsideruar Posta Shqiptare si kompani me kapital tërësisht shtetëror, provuar kjo me konfirmimet zyrtare të Ministrisë së Financave (si institucion i autorizuar në emër të pronarit shtet për shoqërinë “Posta”) krijoi bindjen se kontratat e mësipërme përbënin një bazë të fortë hetimi dhe vlerësimi ligjor mbi gjendjen e konfliktit të interesit, gjendje e cila, nuk figuron e deklaruar në formularët vjetorë të deklarimit të pasurisë dhe konfliktit të interesit dhe as në Regjistrin e Deklarimeve përkatëse në Kuvend.
Për këtë rast, ISP iu drejtua me shkresë Inspektoratit të Lartë të Deklarimit dhe Kontrollit të Pasurisë dhe Parandalimit të Konfliktit të Interesit (ILDKPKI), duke kërkuar nisjen e hetimeve administrative për këtë rast dhe marrjen e masave për ndërprerjen dhe ndëshkimin e gjendjes së paligjshmërisë në kushtet e konfliktit të interesit.
Në përgjigje të komunikimeve të vazhdueshme me ILDKPKI, për rastin e mësipërm, e cila nga ana e saj ka kërkuar edhe dokumentacionin shtesë që dispononim, ky institucion më anë të shkresës Nr.3926/9 prot datë 2.12.2019 ka informuar zyrtarisht dhe në mënyrë të përfundimtare ISP, lidhur me ecurinë dhe masat e marra nga ana e tij për ndjekjen dhe përfundimin e hetimit për deputetin Sadri Abazi. Konkretisht ILDKPKI ka deklaruar në shkresën e mësipërme se për rastin e deputetit Sadri Abazi është konstatuar se ai është në gjendje flagrante të konfliktit të interesit, pasi ka rezultuar e provuar nënshkrimi i kontratave me kompani shtetërore, për të cilat ka ndalesë absolute ligjore.
Deputeti në fjalë, megjithëse duke qenë deputet ka figuruar bashkë-ortak me 25% të aksioneve të Shoqërisë Usluga sh.p.k që ka lidhur dy kontrata qiraje me Posta Shqiptare sh.a, e cila është kompani shtetërore. Në përfundim të hetimit dhe konstatimeve të mësipërme që rezultuan të mbështetura në ligj dhe prova, ashtu sikundër u evidentuan edhe nga ISP në komunikimet dhe kërkesat e mëparshme, ILDKPKI informoi se kishte vendosur marrjen e masës administrative me gjobë në shumën 800.000 mijë lekë ndaj deputetit Sadri Abazi.
ILDKPKI informon ISP-në se deputeti në fjalë, lidhur me këtë gjobë është ankuar në Gjykatën Administrative. Aktualisht procesi vijon në Gjykatën Administrative dhe jemi në pritje të vendimit të saj. Pavarësisht kësaj, duhet vlerësuar puna e ILDKPKI, i cili në mbështetje të dokumentacionit dhe kërkesave të ISP, bëri të mundur reagimin pozitiv dhe të ligjshëm për këtë rast, duke marrë masa konkrete ndëshkimore.
https://politiko.al/bashke-ortak-ne-nje-shoqeri-biznesi-cili-eshte-deputeti-i-ps-ne-gjendje-te-konfliktit-te-interesit-u-gjobit-me-800-mije-leke
