Instituti i Studimeve Politike (ISP), duke mbështetur urdhrin ekzekutiv të Presidentit të SHBA në qershor 2021 për masa të veçanta kundër korrupsionit për zyrtarë të ndryshëm në Ballkanin Perëndimor, vlerëson se vende si Shqipëria kanë nevojë jetike të aplikojnë standarde më të larta për politikanë e politikë të pastër, për dekriminalizimin dhe integritetin e çdo individi me angazhim dhe pozita publike.
Ligji 138/2015 ishte një mekanizëm pozitiv dhe funksional, por vettingu në politikë, në strukturat drejtuese e përfaqësuese të partive dhe në të gjitha institucionet e zgjedhura dhe të emëruara, do t’i jepte dekriminalizimit dhe standardeve të integritetit më shumë legjitimitet, mbështetje dhe besim publik.
Disa zyrtarë të lartë politikë janë deklaruar në listën e zezë të Departamentit Amerikan të Shtetit. Secili prej tyre vijon të ketë imunitet politik, të jetë pjesë e strukturës drejtuese në partitë respektive, të ndikojë në vendimmarrjen e partive të tyre dhe të vendit, si dhe të promovohet në media dhe aktivitete politike si model pozitiv karriere. Një vend anëtar i NATO dhe kandidat për në BE, duhet të ndjekë standarde më të larta integriteti në përfaqësimin politik.
ISP apelon publikisht partitë politike të tregojnë lidership dhe përgjegjshmëri, duke u distancuar publikisht nga çdo zyrtar i tyre i përfshirë në listën e zezë amerikane ose të penalizuar nga dekriminalizimi.
Në përputhje me premtimet për standarde etike, partitë duhet të mënjanojnë nga pozitat drejtuese dhe përfaqësuese parlamentare dhe ekzekutive çdo individ me rekorde të tilla. Në këtë mënyrë, ato kanë rastin të dëshmojnë mbështetje për integritetin e zyrtarëve politikë dhe publikë, për vettingun në politikë, për llogaridhënie dhe për jetësimin e parimeve të shtetit të së drejtës.
Koha kur politikë dhe politikanë të pastër!
ISP është duke zbatuar monitorimin e dekriminalizimit “Për politikë e politikanë të pastër” mbështetur nga MPJ e qeverisë së Mbretërisë së Vendeve të Ulta (Holandës), si dhe projektin “Promovimi i llogaridhënies së zyrtarëve të zgjedhur: zgjedhjet 2021” mbështetur financiarisht nga NED (National Endowment for Democracy).
