Instituti i Studimeve Politike (ISP) mirëpret vendimin e qeverisë së Mbretërisë së Bashkuar për të marrë sanksione antikorrupsion në Shqipëri “kundër disa individëve shqiptarë në lidhje me krimin dhe korrupsionin, të publikuara gjerësisht dhe të dokumentuara”. ISP i bashkohet vlerësimit se “mbështetja që disa figura publike marrin nga kriminelët në shkëmbim të akteve të tyre korruptive, e mbyt zërin e qytetarëve shqiptarë” dhe se “për aq kohë sa politikanët janë në gjendje të bashkëpunojnë me kriminelët për të blerë, shantazhuar dhe kanosur votuesit, demokracia shqiptare do të mbetet e brishtë dhe e paplotë”. Sanksionet amerikane dhe britanike shënojnë një raport të ri të munguar midis Perëndimit dhe Shqipërisë, si dhe një mekanizëm presioni pozitiv për forcimin e demokracisë, transparencës dhe llogaridhënies në institucionet dhe politikën shqiptare.
Duke qenë organizata e vetme e shoqërisë civile që monitoron prej disa vitesh standardet e integritetit dhe dekriminalizimit Instituti i Studimeve Politike (ISP) apelon qeverinë amerikane, qeverinë britanike dhe qeveritë e vendeve kryesore në BE të vijojnë të aplikojnë masa të tilla antikorrupsion. Nevoja për demokraci funksionale në Shqipëri është shumë më e madhe sesa nevoja për stabilitet. Elitat e korruptuara politike nuk mund të jetë shpresë, garanci dhe as partner të besueshëm për reforma, progres dhe integrim.
ISP apelon:
- SPAK për hetime shteruese ndaj skandaleve korruptive dhe abuzuese ku përfshihen zyrtarët e lartë publikë & politikë;
- Kuvendin të reformojë mekanizmin e kontrollit parlamentar, aktet e brendshme rregullatore, si dhe të vendosë në prioritet reformën reale zgjedhore dhe reformën në legjislacionin e partive politike;
- Partitë politike të miratojnë dhe aplikojnë standardet e integritetit në strukturat e tyre vendimmarrëse dhe të largojnë nga radhët e tyre subjektet e penalizuara nga dekriminalizimi dhe sanksionet perëndimore.
Koha për politikë të pastër, për institucione të forta në vend të liderëve të fortë, për transparencë dhe llogaridhënie.
