Në këto 4 vite ligji i dekriminalizimit kompletoi ciklin e parë të zbatimit të tij deri në nivel kapilar, duke përfshirë zgjedhjet për Kuvend dhe për organet e vetëqeverisjes vendore si dhe zëvëndësimi i vakancave respektive. Numri i kandidatëve apo funksionarëve që kanë dorëzuar formularë vetëdeklarimi përgjatë kësaj periudhe 4 vjeçare pranë KQZ-së është rreth 14,500. KQZ ka penguar zgjedhjen apo ushtrimin e funksionit për 56 kandidatë dhe funksionarë publik. Gjithashtu, nuk duhen lënë jashtë vëmendjes dorëheqjet apo refuzimet për të marrë mandatet nga ana e kandidatëve, të cilët në disa raste janë imponuar nga ngurtësia e ligjit dhe në disa raste kanë qenë pjesë e taktikave lokale të kandidatëve të subjekteve politike.
Ligji i dekriminalizimit në të vërtetë i jep përgjigje dilemës nëse një individ me rekorde kriminale mund të jetë përfaqësues i popullit në një sistem demokratik. Zgjedhësit duhet të jenë të informuar për të dalluar qytetarin që shkel ligjin në dëm të jetës së personit, rendit kushtetues dhe autoritetit të shtetit. Por kjo nuk do të thotë që zgjedhësit të mos ndryshojnë pikëpamjet e tyre për përshtatshmërinë e një kandidati në një funksion publik.
Në zgjedhjet e vitit 2019, janë evidentuar përgjatë procesit të verifikimit nga ana e KQZ-së rreth 253 kandidatë të cilët nuk kanë deklaruar dënimet e mëhershme. Këta kandidatë rezultuan të dënuar apo të rehabilituar sipas të dhënave të gjendjes gjyqësore. Një pjesë e tyre janë zëvendësuar nga vetë subjektet politike përgjatë procesit të korrigjimit të dokumentacionit. Pjesa më e madhe e tyre nuk janë kandidatë që kanë marrë mandatet.
Për KQZ dhe mua si Komisioneri Shtetëror i Zgjedhjeve, implementimi i këtij ligji në zgjedhjet parlamentare të datës 25 prill 2021, paraqet një sfidë të jashtëzakonshme.
http://cec.org.al/ligji-i-dekriminalizimit-dhe-sfidat-e-implementimit-ne-zgjedhjet-e-25-prillit-2021/
