Kodi Zgjedhor (2020) i njohu të drejtën KQZ të kryejë verifikim të plotë të dokumentacionit dhe votave në 10% të qendrave të votimit, (519 QV që përfaqësonin 10% të qendrave të votimit për çdo KZAZ nga 5199 QV). Në përfundim Komisioneri Shtetëror i Zgjedhjeve (KSHZ) vendosi të bëhet kallëzim pranë organit të prokurorisë për shkeljet e konstatuara nga 20 shtetas në 35 qendra votimi. Gjithashtu KSHZ pasi shqyrtoi raportin me gjetjet dhe problematikat e konstatuara, vendosi miratimin e raportit, t’i kërkojë Komisionit të Ankimimeve dhe Sanksioneve vendosjen e sanksioneve administrative ndaj 32 sekretarëve të komisioneve të qendrave të votimit, si dhe të bëjë kallëzim penal pranë organit të prokurorisë për shkeljet e konstatuara nga 67 anëtarët e 18 grupeve të numërimit.
Vlen të theksohet se 67 kallëzimet lidhen me vetëm 10% të qendrave të votimit, 
pra nëse do të kishim 100% verifikime, atëherë do të duhej, sipas këtij raporti, të kishim 670 kallëzime penale. Kjo është një shifër e lartë kallëzimesh penale dhe një tregues i problematikave në administrimin partiak të zgjedhjeve, por edhe një produkt i rastësisë, 67 i kalojnë drejtësisë për shkak të shortit, jo për shkak së masës së shkeljes me pjesën tjetër të supozuar të 603 komisionerëve që nuk kallëzohen penalisht për shkak se ishin me fat sepse nuk ishin pjesë e shortit nga KQZ.
KQZ nuk ka bërë publike listën e plotë të anëtarët e grupeve të numërimit për të krijuar një ide më të qartë rreth përkatësisë politike, profesioneve, angazhimit të tyre në role partiake apo shtetërore, ndërkohë që një praktikë e njëjtë në zgjedhjet e vitit 2017 nuk çoi në hetimin shterues dhe as dënimin penal të komisionerëve.
Vendimi për kallëzim penal vjen 8 muaj pas përfundimit të procesit zgjedhor të zgjedhjeve parlamentare 2021, dhe pavarësisht se është korrekt në procedurë, duket se kemi të bëjmë me një akt të vonuar dhe pa ndikim në standardet e ardhshme të zgjedhjeve. Prej së paku 3 muajsh parlamenti i ri është funksional, Kuvendi ka ngritur një komision hetimor mbi zgjedhjet dhe se pritet të nisë punë edhe komisioni për reformën zgjedhore.
ISP do të monitorojë ecurinë e kallëzimit penal në Prokurori, me shpresën se këtë herë, ndryshe nga 2015 dhe 2017, Prokuroria do të ketë një qasje më ligjore dhe më të përgjegjshme në lidhje me shkeljet penale të legjislacionit zgjedhor.
Lista qe kalon ne hetime nga Prokuroria:
