Gjatë shqyrtimit të kësaj çështjeje Gjykata e Lartë ka konstatuar se nga tre të pandehurit vetëm i pandehuri Tom Doshi është deputet i Kuvendit të Shqipërisë, ndërsa dy të pandehurit e tjerë nuk e kanë këtë cilësi. Sipas përfaqësuesve të palëve çështja mund të ndahet, në zbatim të nenit 93/2 të KPP-së, sepse Gjykata e Lartë ka juridiksion fillestar vetëm për të pandehurin deputet, kurse dy të akuzuarit e tjerë të gjykohen nga gjykata e shkallës së parë. Ndërkohë Prokuroria e Përgjithshme është shprehur në gjykim se në rastin konkret duhet të zbatohet neni 80/2 i KPP-së që rregullon rastet e bashkimit të procedimeve që janë në kompetencë të gjykatave të ndryshme dhe se për shkak të elementit bashkëpunim çështja nuk mund të ndahet, por duhej që të tre të pandehurit të gjykohen nga Gjykata e Lartë si shkallë e parë.
3. Gjykata e Lartë (gjykata referuese), duke vlerësuar se pika 2 e nenit 80 të KKP-së është e papajtueshme me Kushtetutën, me vendimin e datës 21.12.2015 ka pezulluar gjykimin e çështjes dhe i është drejtuar Gjykatës Kushtetuese për kontrollin e kushtetutshmërisë së normës.
Duke e vlerësuar legjitimimin e gjykatës referuese në këndvështrim të kritereve të mësipërme, Gjykata vëren se në rastin konkret gjykatës referuese i është kërkuar të ushtrojë juridiksionin fillestar për gjykimin e çështjes penale ndaj shtetasve Tom Doshi, Mark Frroku dhe Durim Bami, të akuzuar për veprën penale “Kallëzim i rremë”, të kryer në bashkëpunim, të parashikuar nga nenet 305 dhe 25 të Kodit Penal. Në kushtet kur njëri prej të pandehurve ka cilësinë e deputetit, bazuar në nenin 141/1 të Kushtetutës dhe nenin 75/b/2 të KPP-së, Gjykata e Lartë është gjykata kompetente për gjykimin e akuzës penale ndaj tij. Po ashtu, sipas nenit 80/2 të KPP-së në rastin konkret ndodhemi para procedimeve të lidhura, ku njëri është në kompetencë të Gjykatës së Lartë, kjo e fundit është gjykata kompetente edhe për gjykimin e procedimeve të tjera. Për pasojë, neni 80/2 i KPP-së është i zbatueshëm në rastin konkret pasi lidhet drejtpërdrejt me përcaktimin e gjykatës kompetente për gjykimin në themel të kësaj çështjeje penale, çka është parakusht për respektimin e te drejtës së palëve për një proces të drejtë dhe për t`u gjykuar nga një gjykatë e pavarur dhe e caktuar me ligj. Në këto kushte, në kuptim të plotësimit të kritereve për legjitimimin e saj, Gjykata vlerëson se gjykata referuese ka identifikuar dispozitën ligjore të zbatueshme në rastin konkret, si dhe ka parashtruar argumente për sa i përket jokushtetutshmërisë së dispozitës, të cilat, sipas saj, mbështesin pretendimet për cenimin e normave dhe të parimeve konkrete kushtetuese.
Vendimi i plotë mund të lexohet & shkarkohet këtu:
GJK – Vendim lidhur me papajtueshmërine midis KSH dhe KPP
