PARTIA SOCIALISTE

Sipas Statutit të Partisë Socialiste, Neni 46 ‘Sekretariati ekzekutiv i partisë socialiste është organ politik i partisë me funksione ekzekutive. Sekretariati ekzekutiv drejton veprimtarinë e përditshme të partisë sipas tematikave dhe sektorëve që sekretarët mbulojnë’. Sipas pikës 2 të këtij neni, funksionet e sekretarëve të partisë janë të papajtueshëm me funksionet në kabinetin qeveritar, por sidoqoftë sipas pikës 3 është asambleja ajo që i zgjedh dhe që përcakton fushën e veprimtarisë së tyre.

Nenet 43 dhe 44 të Statutit të Partisë Socialiste trajtojnë funksionet, detyrat dhe përbërjen e Kryesisë si një organ politik drejtues i veprimtarisë së partisë në periudhën midis mbledhjeve të Asamblesë Kombëtare. Kryesia e Partisë përbëhet nga Kryetari i Partisë, Sekretari i Përgjithshëm, Sekretarët Ekzekutivë si dhe anëtarët e Kryesisë të zgjedhur nga anëtarët e Asambleja Kombëtare. Një nga detyrat më të rëndësishme të Kryesisë socialiste është që më propozim të kryetarit të Partisë miraton kandidaturat për deputetë, kryetar bashkie apo kryetarë qarqesh. Po ashtu, Kryesia me propozim sërish të Kryetarit të Partisë miraton kandidaturat për kryetar të grupit parlamentar dhe të komisioneve parlamentare që më pas përzgjidhen nga Grupi Parlamentar socialist.

Përkatësisht Neni 41 dhe 42 i Statutit të Partisë Socialiste trajtojnë përbërjen, drejtimin dhe funksionimin e Asamblesë Kombëtare. Anëtarët më të shumtë të Asamblesë Kombëtare përzgjidhen nga Kongresi Partisë Socialiste, i cili i zgjedh në bazë të kandidaturave alternative dhe me votim të fshehtë. Në përbërje të Asamblesë Kombëtare janë dhe anëtarët ex-officio të saj të cilët janë: Kryetari i Partisë Socialiste, deputetët, ministrat që janë anëtarë partie, kryetarët e bashkive, kryetari i FRESH, kryetarët e tjerë të sindikatave, të forumit të gruas etj. Por anëtarët ex-officio të Asamblesë Kombëtare të PS nuk duhet që të kalojnë 10% të të gjithë anëtarëve, duke i dhënë rëndësi anëtarëve të Asamblesë Kombëtare të zgjedhur nga Kongresi. Asambleja Kombëtare e PS ka detyra të rëndësishme përsa i përket miratimit të aleancave me partitë e tjera politike por edhe me miratimin e programit politik të qeverisjes. Gjithashtu është Asambleja ajo që vendos për caktimin e mbajtjes së zgjedhjeve të brendshme në Partinë Socialiste.