PARTIA DEMOKRATIKE

Neni 57 i Statutit të Partisë Demokratike përcakton dhe mënyrën e përzgjedhjes dhe funksionimin e sekretarëve funksionale. Kështu sipas pikës 1 ‘Sekretari i Përgjithshëm në ushtrimin e kompetencave të tij ndihmohet nga 4 (katër) sekretarë funksionalë, të cilët zgjidhen nga Këshilli Kombëtar, midis dy kandidaturave për secilin pozicion, të propozuara nga Kryetari i PDSH-së’. Sipas pikës 2 dhe pikës 3, çdo Sekretar Funksional mbulon fushat që përcaktohen me udhëzim të Kryetarit të PDSH-së. Detyrat dhe përgjegjësitë e detajuara të sekretarëve funksionalë përcaktohen në Rregulloren e Brendshme dhe/ose me udhëzim/vendim të Kryesisë së PDSH-së.

Neni 52 dhe 53 I Statutit të Partisë Demokratike trajton përbërjen dhe funksionet kryesore të Kryesisë së PDSH-së.

Sipas nenit 52 kryesia përbëhet nga: Kryetari i Partisë; Nënkryetarët e Partisë; Sekretari i Përgjithshëm, dhe Sekretarët Funksionalë të zgjedhur nga Këshilli Kombëtar; Kryetarët e organizatave partnere si dhe nga 15 (pesëmbëdhjetë) anëtarë të zgjedhur me votim të fshehtë nga Këshilli Kombëtar, nëpërmjet një numri kandidaturash të paktën sa dyfishi i numrit të vendeve vakante. Gjithashtu pjesë e kryesisë janë dhe Zëdhënësi i Partisë, si dhe Sekretari për Marrëdhëniet Ndërkombëtare që emërohen nga Kryetari i PDSH-së.

Neni 53 përcakton kompetencat e Kryesisë që ndër të tjera janë: siguron zbatimin e vendimeve të marra nga Kuvendi dhe Këshilli Kombëtar; miraton marrëveshjet politike; Kryesia ka të drejtën e ndërhyrjes dhe refuzimit të kandidaturave të përzgjedhura nga organet vendore të Partisë si dhe emëron drejtues të ndryshëm.

KËSHILLI  KOMBËTAR

Në dy nene të Statutit Kombëtar të Partisë Demokratike (Neni 49 & Neni 50) përmenden përbërja dhe funksionimi i Këshillit Kombëtar. Sipas nenit 49  Këshilli Kombëtar, në përputhje me programin, Statutin dhe vendimet e Kuvendit Kombëtar, drejton veprimtarinë e Partisë në periudhën midis dy Kuvendeve.

Ai përbëhet nga Kryetari dhe nënkryetarët e PD-së si dhe  Sekretari i Përgjithshëm dhe sekretarët funksionalë të Partisë. Po ashtu pjesë e tij janë dhe  Ish-Presidentët, ish-Kryeministrat, ish-Kryetarët e Kuvendit dhe ish-Kryetarët e PDSH-së, që janë anëtarë të PDSH-së në çastin e thirrjes së Këshillit Kombëtar; deputetët;  ministrat në detyrë, anëtarë të PDSH-së; kryetari i Bordit Financiar të Partisë; anëtarët e Kolegjit të Kryetarëve;  kryetarët e organizatave partnere;  drejtuesit e Departamenteve të PDSH-së; kryetarët e Bashkive dhe Kryetarët e Këshillave të Bashkive dhe të Qarkut, që i përkasin Partisë Demokratike etj.

Sipas Nenit 50 ‘Këshilli Kombëtar merr të gjitha vendimet e rëndësishme politike që mund të kërkojnë rrethanat kur Kuvendi Kombëtar nuk është i mbledhur dhe kur ato nuk janë parashikuar në këtë Statut si e drejtë vetëm e Kuvendit’.