Raporti vjetor i DAP 2018
Gjatë vitit 2018, Departamenti i Administratës Publike, ka administruar 2360 formularë vetëdeklarimi, në kuadër të zbatimit të ligjit të dekriminalizimit. Nga verifikimi, 70 punonjës kanë rezultuar në kushtet e shkeljes së ligjit të dekriminalizimit. Ata janë larguar nga administrata për shkak të veprimit të ligjit. “Në zbatim të legjislacionit, gjatë vitit 2018 është realizuar procesi i verifikimit paraprak të të dhënave të deklaruara në formularë nga subjektet vetëdeklaruese me Drejtorinë e Përgjithshme të Gjendjes Civile, si edhe me Drejtorinë e Përgjithshme të Burgjeve. Më pas është vijuar me kërkesën për verifikimin e plotë të të dhënave të deklaruara nga këto subjekte, nga Prokuroria e Përgjithshme. Në përfundim të procesit të verifikimit, nga të emëruarit gjatë vitit 2018 rezultojnë 70 subjekte vetëdeklaruese të konstatuar në kushtet e ndalimit të ushtrimit të funksionit publik (ose 2.9 % e numrit total të subjekteve vetëdeklaruese për këtë vit)”, thuhet në raportin vjetor 2018
Raporti vjetor i DAP 2017
Integriteti i personave që zgjidhen, emërohen ose ushtrojnë funksione publike Gjatë vitit 2017, Departamenti i Administratës Publike, në cilësinë e organit përgjegjës për marrjen në dorëzim, administrimin dhe përpunimin e formularëve të vetëdeklarimit për nëpunësit në shërbimin civil dhe shërbimin diplomatik, si dhe drejtuesit e çdo niveli në administratën publike të nivelit qendror dhe vendor që nuk përfshihen në shërbimin civil, ka administruar rreth 3500 formularë vetëdeklarimi të plotësuar nga subjekte vetëdeklaruese, në zbatim të ligjit nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”, i ndryshuar.
Në zbatim të legjislacionit, gjatë vitit 2017 është realizuar procesi i verifikimit paraprak të të dhënave të deklaruara në formularë nga subjektet vetëdeklaruese me Drejtorinë e Përgjithshme të Gjendjes Civile, si edhe me Drejtorinë e Përgjithshme të Burgjeve. Më pas është vijuar me kërkesën për verifikimin e plotë të të dhënave të deklaruara nga këto subjekte, nga Prokuroria e Përgjithshme.
Në përfundim të procesit të verifikimit, nga të emëruarit gjatë vitit 2017, rezultojnë 12 subjekte vetëdeklaruese të konstatuar në kushtet e ndalimit të ushtrimit të funksionit publik (ose 0.3% e numrit total të subjekteve vetëdeklaruese për këtë vit). Nga 12 subjekte vetëdeklaruese, që rezultojnë në kushtet e ndalimit të ushtrimit të funksionit publik, 2 prej tyre janë konstatuar nga organi përgjegjës DAP në zbatim të procedurave të parashikuara në Kreun V, të vendimit nr.17/2016, të Kuvendit të Republikës së Shqipërisë, ndërsa 10 subjekte vetëdeklaruese janë konstatuar me vendimin “Për miratimin e rezultateve të verifikimit, në zbatim të ligjit nr.138/2015”, nga Prokuroria e Përgjithshme, në vijim të kërkesës për verifikim të plotë, të përcjellë nga Departamenti i Administratës Publike. Ndërkohë, Prokuroria e Përgjithshme ka vijuar me përcjelljen e
vendimeve “Për miratimin e rezultateve të verifikimit, në zbatim të ligjit nr.138/2015” dhe, si rezultat, konstatohet se janë në kushtet e ndalimit edhe 34 subjekte të tjera, të cilët kanë qenë në detyrë në momentin e hyrjes në fuqi të këtij ligji. Pra, në total numri i subjekteve të konstatuar në kushtet e ndalimit gjatë vitit 2017 është 46 (nga 3534 formularë vetëdeklarimi).
Raportet e plota mund të lexohen ose shkarkohen këtu:
http://dap.gov.al/publikime/raporte-vjetore
