- Sa janë zbatuar parimet e dekriminalizimit në procesin aktual zgjedhor?
- Cilat janë cilësitë e përfaqësimit politik, rëndësia e tyre dhe përputhshmëria me pritshmëritë qytetare në procesin zgjedhor 2025?
- Cilat janë treguesit kryesorë të gjetjeve në integritetin e zyrtarëve të lartë, përfshirë ato të administrimit zgjedhor dhe organet ligjzbatuese?
- Cilat janë ndikimet informale në vendimmarrje, risqet dhe sfidat për politikë të pastër?
- A mund të kemi veting dhe llogaridhënie të politikanëve dhe zyrtarëve të lartë?
- Sa efektive janë praktikat hetimore antikorrupsion dhe cilat janë nivelet e zbatimit të ligjeve në Shqipëri?
- Cili është roli i brezit të ri, studentëve dhe botës akademike, ekspertëve dhe zërave moderatorë për më shumë cilësi përfaqësimi dhe llogaridhënie?
- Roli specifik i studentëve të drejtësisë në kuadër plotësues për reformat prioritare të nisura në vend dhe sfidat në procesin e bisedimeve me BE?
Këto dhe tema të tjera plotësuese ishin pjesë e forumit të hapur të mbajtur nga Instituti i Studimeve Politik (ISP) me studentë të drejtësisë dhe shkencave politike në Universitetin “Marin Barleti” në Tiranë. Nën moderimin e Dr. Dorjana Pano ekspertët Prof. Ervin Karamuço dhe Dr. Erion Kristo kontribuuan me opinione profesionale dhe adresuan shqetësimet, gjetjet dhe rekomandimet lidhur me jetësimin e dekriminalizimit në Shqipëri, integritetin në vendimmarrje dhe sfidat për politikë e zyrtarë të pastër. Profesorë dhe studentë nga UMB u bënë pjesë aktive e diskutimit, duke treguar interes të lartë edhe në kontekstin e zhvillimeve aktuale elektorale në Shqipëri.
Aktiviteti ishte pjesë e projektit në zbatim “Promovimi i llogaridhënies së zyrtarëve të zgjedhur”, të cilin Instituti i Studimeve Politike (ISP) po e zbaton me mbështetjen financiare të National Endowment for Democracy (NED). Ky projekt përbën një angazhim të vazhdueshëm të ISP-së në ndjekjen e zbatimit të ligjit të dekriminalizimit dhe sigurinë e integritetit të individëve që zgjidhen, emërohen ose ushtrojnë detyra publike në Shqipëri.
