31 May 2016
Sot një kryetar socialist bashkie dha dorëheqjen pasi ishte gjykuar e dënuar në mungesë, pa dijeninë e tij, teksa ishte minoren dhe emigrant në Itali. Pavarësisht se ai vetë e konsideron veten të pafajshëm, pavarësisht se faktet për të kaluarën e tij nuk i nxorrën kundërshtarët politikë që deri më sot kanë hedhur veç baltë e shpifje. Kryetari i bashkisë u dorëhoq, pasi në familjen tonë politike të gjithë jemi të barabartë përpara ligjit dhe askush nuk mund të ushtrojë detyra publike për sa kohë është në kundërshtim me ligjin.
Ne që e kemi mbrojtur zotin Roshi, pasi në fund të fundit ai ishte i pafajshëm për aq kohë sa nuk provohej e kundërta, sot i themi se pafajësinë ai duhet ta provojë në instancat gjyqësore.
Ligji qëndron mbi të gjithë ne, e për sa kohë ligji është shkelur, edhe pse në rrethana krejtësisht misterioze, ne nuk na mbetet asgjë për të bërë veçse ta respektojmë ligjin dhe dënimet që ai përcakton për shkelësit.
Ky qëndrim tregon moralin e forcës tonë politike dhe faktin se ne dekriminalizimin e kemi seriozisht, jo si kundërshtari ynë që ndryshe thotë e ndryshe bën.
Në Partinë Demokratike ka një ish ministër të brendshëm, sot deputet, që ka bërë deklarim të rremë në formular duke fshehur ndalimin e tij nga policia. Dhe sot as Flamur Noka e as PD nuk arrijnë të japin qoftë edhe një sqarim të vetëm për rastin në fjalë.
Në Partinë Demokratike vetë nr. 2 i saj rezulton i dënuar me burg për shkelje të rëndë të Kushtetutës, por Arben Ristani bën sikur nuk dëgjon e nuk kupton, se një shpjegim ia ka borxh publikut.
E kështu me radhë, deputetë të tjerë si Alban Zeneli, i dënuar, apo kryetarë bashkish të dënuar për korrupsion apo të turpëruar publikisht për raste abuzimi seksual.
Sigurisht që asgjë e moralshme dhe parimore nuk mund të pritet nga një parti e cila në krye ka Lulzim Bashën, që akuzave të rënda për korrupsion u bëri bisht duke përdorur një raport mjekësor.
Por ky i sotmi është rasti për të bërë dallimin mes nesh dhe kundërshtarëve tanë politikë. Ne që respektojmë ligjin dhe pranojmë rrjedhojat e gabimeve të bëra, edhe të atyre që të kapur në flagrancë të plotë luajnë rolin e budallait.
Në çdo vend demokratik, çdo individ përgjigjet për veten e tij. As Partia Socialiste, as Partia Demokratike, as Edi Rama e as Lulzim Basha nuk janë përgjegjës për gabimet që mund të bëjnë përfaqësues të partive. Por ndryshe nga Edi Rama, që çdokujt që gabon i tregon ligjin, Lulzim Basha është përgjegjës për mbrojtjen politike që i jep të vetëve, edhe kur janë në shkelje të plotë të çdo norme e ligji.
http://www.ps.al/te-reja/ndryshe-nga-pd-qe-te-denuarit-merr-ne-mbrojtje-ps-e-vendosur-te-zbatoje-ligjin-e-dekriminalizimit
