Instituti i Studimeve Politike (ISP) vlerëson pozitivisht vendimin unanim të KQZ për shpalljen e pavlefshëm dhe përfundimin e parakohshëm të mandatit të kryetarit të bashkisë Vorë, Agim Kajmaku, në zbatim të ligjit nr.138/2015 ”Për garantimin e integritetit të personave që zgjidhen, emërohen ose ushtrojnë funksione publike”. Vendimi i KQZ i dha fund standardeve të dyfishta që ky institucion ka ndjekur në shqyrtimin e disa nga kërkesat e mëparshme të Institucionit të Prokurorisë lidhur me zbatimin integral të ligjit 138/2015.
ISP përgëzon subjektin politik “Partia Demokratike”, e cila inicoi në rrugë institucionale procesin e verifikimit dhe mblodhi të dhëna të sakta për kryetarin e bashkisë Vorë, duke sjellë shkarkimin e tij. Ky është një rast suksesi kur një forcë politike ia arrin të gjejë, ofrojë dhe adresojë të dhëna të besueshme, të cilat do të duhej të ishin përgjegjësi e vetë institucioneve shtetërore.
ISP vlerëson edhe reagimin pozitiv të subjektit politik “Partia Socialiste” për mbështetjen e vendimit të KQZ. Ky zhvillim është një leksion tjetër institucional për këtë forcë politike, për të pranuar përgjegjësi dhe korrektuar praktikat e promovimit të kandidatëve/zyrtarëve si dhe për tu distancuar nga çdo raportim tjetër që lidhet me pozita të papërshtatshme me ligjin mbi dekriminalizimin. ISP apelon PS të largojë nga strukturat e saj drejtuese qendrore e lokale të gjitha subjektet e gjendura në shkelje të ligjit 138/2015.
ISP vlerëson edhe prokurorinë, njësinë speciale të dekriminalizimit, e cila administroi me korrektesë dhe transparencë të dhënat e ofruara dhe i dha besueshmëri procesit të vendimmarrjes lidhur me këto të dhëna. Rasti është nxitës që prokuroria të operojë me të njëjtat standarde dhe shpejtësi edhe për subjekte të tjera të raportuara/akuzuara se ndodhen në gjendje të papajtueshme me ligjin e dekriminalizimit, sidomos kur kemi të bëjmë me funksionarë të lartë shtetërore dhe politikë.
Së fundi, rastet e kryetarëve të zgjedhur më 30.06.2019 në bashkisë Shkodër dhe në Vorë, dhe raste të njëjta që mund të evidentohen gjatë muajve në vijim, janë një sinjal alarmi për mungesën e një sistemi transparent karriere, përzgjedhje dhe promovimi të zyrtarëve politikë nga ana e subjekteve politike.
ISP është organizata e vetme e shoqërisë civile, e cila gjatë vitit 2019-2021 në kuadër të Programit MATRA të Qeverisë së Qeverisë së Mbretërisë së Vendeve të Ulëta, po kryen monitorimin e ligjit të dekriminalizimit. Nisma “Jetësimi cilësor i dekriminalizimit: për politikë dhe zyrtarë të pastër”, pjesë e së cilës është edhe database publike www.dekriminalizimi.isp.com.al, është pjesë e projektit monitorues e sensibiluzues në funksion të jetësimit të të gjithë elementëve dhe standardeve të parashikuara nga ligji 138/2015 dhe ndryshimet përkatëse kushtetuese.
