Të gjitha partitë politike kanë dorëzuar listat e kandidatëve të tyre pa asnjë verifikim paraprak në organet e Drejtësisë. Shumë prej atyre që janë vendosur në listat e partive pritet të kalojnë filtrin e parë verifikues që është Drejtoria e Përgjithshme e Burgjeve, e cila në fakt ligjërisht konfirmon vetëm ata që kanë pasur një dënim, por jo nëse ka apo jo hetime nga tyre. Drejtoria e Dekriminalizimit në Komisionin Qëndror të Zgjedhjeve ka përcjellë të gjithë emrat në Drejtorinë e Burgjeve dhe Prokurori, por kjo e fundit mbetet gjithmonë në afate të vonuara, sepse duhet të bëjë verifikime edhe jashtë vendit, pra nëse një kandidat ka qenë nën hetim, i ndaluar, arrestuar, apo i dënuar jashtë kufijve të Shqipërisë.
Koha në dispozicion nuk është e mjaftueshme dhe kësisoj, nëse një kandidat që bën fushatë, ndoshta dhe e merr mandatin largohet më vonë nga parlamenti, por vendin e tij e zë një tjetër po nga e njëjta parti. Duket se nisur nga kjo, vetë partitë nuk kanë interes të heqin dorë nga kandidatët e fortë, por të marrin sa më shumë vota dhe nëse një kandidat preket nga dekriminalizimi vendin e merr kandidati i radhës në listë. A ka qenë kjo një strategji e partive për të marrë sa më shumë vota. Ekspertë të ndryshëm të politikës e pranojnë, por nga ana tjetër kërkojnë mekanizma ligjorë më të shpejtë për të kryer verifikimet e kandidatëve.
Instituti i Studimeve Politike vlerëson se zgjidhja më oportune do të kishte qenë që vetë partitë politike të mund të dërgonin listat e kandidatëve paraprakisht në Prokurori për verifikim, që Ministria e Drejtësisë të mund të vendosë në mënyrë funksionale në dispozicion të KQZ database të individëve të dënuar brenda e jashtë vendit, dhe që vetë KQZ të ishte asistuar me personel shtesë për verifikimin cilësor të të dhënave në afatin minimal kohor.
Speciale: Top Channel / Top News
