Nën presionin amerikan kryetari i PD Lulzim Basha deklaroi dje se “për të shmangur çdo keqkuptim dhe për të konkretizuar këtë qëndrim të vetë z. Berisha, kam vendosur që deri në përfundimin e shqyrtimit të kërkesës ligjore për transparencë dhe zbardhjes së plotë të kësaj çështje në rrugë gjyqësore, z. Berisha nuk do të jetë anëtar i Grupit Parlamentar të Partisë Demokratike”. Vendimi i tij u bë publik përpara mbledhjes së kryesisë dhe grupit parlamentar. Ky është një prej vendimeve më të rëndësishme në historinë 20 vjecare të PD dhe rasti i parë kur një politikan i lartë lërgohet nga një parti politikë për shkak të akuzave se “aktet korruptive të ish-presidentit të Shqipërisë, Sali Berisha minuan demokracinë në Shqipëri”.
Në motivimin e vendimit të DASH më 19.05.2021 theksohej se “në cilësinë e tij zyrtare si kryeministër i Shqipërisë në veçanti, Berisha ishte përfshirë në veprime korruptive, të tilla si shpërdorim i fondeve publike dhe ndërhyrje në proceset publike, duke përfshirë përdorimin e pushtetit të tij për përfitimet e tij personale dhe për të pasuruar aleatët e tij politikë dhe anëtarët e familjes së tij në kurriz të besimit të publikut shqiptar në institucionet e tyre qeveritare dhe zyrtarët publikë. Për më tepër, retorika e tij tregon se ai është i gatshëm të mbrojë veten, anëtarët e familjes së tij dhe aleatët e tij politikë në kurriz të hetimeve të pavarura, përpjekjeve antikorrupsion dhe masave të përgjegjësisë. Me këtë përcaktim, unë po rikonfirmoj nevojën për llogaridhënie dhe transparencë në institucionet demokratike të Shqipërisë, proceset qeverisëse dhe veprimet e zyrtarëve publikë shqiptarë”.
Vendimi i kryetarit të PD u bë një ditë përpara mbledhjes së parë të legjislaturës së re të parlamentit, si dhe hyri menjëherë në zbatim, pavarësisht kritikave dhe pakënaqësive që shkaktoi tek z.Berisha dhe mbështetësit e tij në PD.
Disa orë më pas ambasada e SHBA në Tiranë deklaroi se “vendimi i vështirë i shpallur dje nga Kryetari Lulzim Basha meriton respekt. Ky vendim demonstron se, ashtu siç ndodhi 30 vjet më parë dhe në momente të tjera kritike në historinë e Shqipërisë, Partia Demokratike ka kurajon për t’u ndarë nga e shkuara me qëllim që të ndërtojë të ardhmen, për të ndihmuar që ta udhëheqë Shqipërinë përpara. Shtetet e Bashkuara kanë pasur një marrëdhënie të veçantë me Partinë Demokratike që nga themelimi i saj dhe presim me kënaqësi të punojmë më ngushtë se kurrë me Kryetarin Basha dhe Partinë Demokratike për të forcuar marrëdhëniet SHBA-Shqipëri”.
Prej muajit maj 2021 kur u bë publike vendimi i palës amerikane për z.Berisha, ISP ka deklaruar publikisht mbështetje për largimin nga parlamenti dhe strukturat drejtuese të partive të individëve me rekorde kriminale apo të përfshirë në listën e zezë amerikane. Të njëjtat qëndrime janë mbajtur edhe për dy raste të ngjashme, ndaj kryetarit të PSD Tom Doshi dhe anëtarit të kryesisë së PS, ish kryetarit të Bashkisë Durrës Vangjush Dako. Emra të tjerë VIP pritet të jenë pjesë e listës së zezë dhe hetimeve në kuadër të masave antikorrupsion dhe vettingut në politikë. Partitë në çdo rast duhet të distancohen nga zyrtarët e tyre përgjegjës pavarësisht postit të tyre politik, si dhe të promovojnë standarde etike në proceset zgjedhore brenda atyre.
Nevoja për politikë më të pastër, për llogaridhënie dhe transparencë kërkon politikanë me integritet, institucione të besueshme dhe demokraci funksionale.
