Në mars 2022 zhvillohen zgjedhjet e pjesshme lokale në 6 bashki. Në bashkitë Shkodër dhe Vorë vakanca u krijua për shkak të papajtueshmërisë së kryetarëve të zgjedhur me standardet e dekriminalizimit. Pritshmëria se procesi i dekriminalizimit do të largonte nga politika individët me rekorde kriminale dhe penale rezultoi jo realiste.
Ligji u miratua më 2015 dhe përgjatë 6 viteve ende vijojnë largimet për shkak të dekriminalizimit të zyrtarëve të zgjedhur ose të emëruar. Zgjedhjet e marsit janë një test serioz që partitë të kandidojnë në zgjedhje individë me integritet dhe që partitë të jetësojnë standardet e dekriminalizimit në përfaqësimin e tyre në administratën zgjedhore, në fushatën elektorale, në stafet e kandidatëve dhe në jetën publike.
Gjatë vitit 2021 u zhvilluan debate mbi integritetin dhe standardet etike brenda partive politike. debatet vijojnë edhe gjatë vitit 2022, ndërkohë që pritet të ketë reformim të legjislacionit zgjedhor dhe të legjislacionit mbi partitë politike. Zhvillimet në partitë kryesore politike dëshmuan rëndësinë e transparencës, llogaridhënies dhe të standardeve të integritetit në politikë. Qytetarët presin që partitë të funksionojnë në mënyrë demokratike dhe jetësojnë parimet e nenit 9 të Kushtetutës, në organizim, në përfaqësim dhe në financim.
Instituti i Studimeve Politike (ISP) me mbështetjen e NED (National Endowment for Democracy) është duke monitoruar proceset e brendshme në partitë politike, zgjedhjet e pjesshme lokale dhe zgjedhjen apo emërimin e zyrtarëve të lartë në nivel qendror dhe vendor. Database http://dekriminalizimi.isp.com.al/ ofron informacion mbi këtë proces.
Ne besojmë se është koha për politikanë dhe zyrtarë të pastër, për integritet, transparencë dhe llogaridhënie në vendimmarrjet me qytetarët dhe për qytetarët!
https://youtu.be/KglZwP2LOvE
