Këshilli i Lartë Gjyqësor, KLGJ u mblodh të premten më 14 prill 2023 për të shqyrtuar projektvendimin për caktimin me short të relatorit të procedimit disiplinor të filluar ndaj dy gjyqtarëve të Elbasanit, Bujar Musta dhe Ramazan Avdiu, të shkarkuar nga detyra prej Komisionit të Pavarur të Kualifikimit, KPK në vitin 2021. Pas hedhjes së shortit, relator u caktua anëtari i KLGJ-së, gjyqtari Ridvan Hado.
Procedimi disiplinor për këta dy gjyqtarë bazohet në kërkesën e Inspektorit të Lartë të Drejtësisë, ILD, që i ka kërkuar KLGJ-së të caktojë masën disiplinore të uljes së përkohshme të pagës për Mustën, ndërsa ndaj Avdiut të jepet vërejtje publike.
Megjithatë, asnjë prej këtyre gjyqtarëve nuk është sot në detyre pas vendimeve të shkarkimit nga Komisioni i Pavarur i Kualifikimit.
Bujar Musta u shkarkua nga detyra prej Komisionit më 17 shtator 2021, pasi u konkludua se me veprimet dhe mosveprimet e tij kishte cënuar besimin e publikut tek sistemi i drejtësisë në të tri kriteret e rivlerësimit, atë të pasurisë, pastërtisë së figurës dhe profesionalizmit. Në vendimin e KPK arsyetohet se ai ka kyer veprime fiktive për të fshehur një apartament, si dhe ka favorizuar të pandehurit me veprime të kundërligjshme në ushtrimin e detyrës.
Ramazan Avdiu u shkarkua me 6 maj 2021 me shumicë votash. Shumica e trupës së KPK konkludoi se gjyqtari i Elbasanit, Ramazan Avdiu ka vepruar si tregtar në disa huadhënie ndër vite dhe ngriti dyshime se me këto veprime kishte krijuar një skemë për justifikimin e të ardhurave duke cënuar besimin e publikut tek drejtësia. Pakica çmoi se Avdiut nuk iu dha mundësia për një mbrojtje objektive.
Vendimet për shkarkimet e gjyqtarëve Mustaddhe Avdiu, nuk kanë marrë formë të prerë, pasi nuk janë shqyrtuar ende nga Kolegji i Posaçëm i Apelimit. Aktualisht ata janë të pezulluar nga ushtrimi i funksionit të gjyqtarit dhe deri në vendimarrjen përfundimtare të Kolegjit paguhen me rrogë të reduktuar.
